Miluba sa papa sa iyang uyab tiklo

CEBU, Philippines - Nabalhog sa prisohan ang usa ka ulitawo human niya dunggaba ang amahan sa iyang uyab didto sa sitio Lawis, barangay Mambaling, ning dakbayan sa Sugbo sa miaging hapon.

Ang nagtingkagol na karon ug nag-atubang og kaso, mao si Christopher Saraum, 22, ulitawo nga taga Lawis, samtang ang biktima mao si Romeo Natural,48, nga taga sitio Wangyu , Mambaling.

Ang biktima mitug-an sa kapolisan nga midu-aw siya sa balay sa iyang ugangan didto sa sitio Lawis, dihang nasugatan niya sa dalan ang suspetsado.

Tungod kay uyab sa iyang anak, gipangutana kini sa biktima kun hain na ang iyang anak nga si Regilou Natural, apan wala panumbalinga sa suspetsado ang maong pangutana .

Gumikan sa kasuko nga wala siya tagda, gihanaan kini og sukmag sa biktima apan mikaratel og dagan ang suspek.

Apan sa pagbalik niini nagdala na og kutsilyo nga may 13 pulgadas ang gitas-on unya gidasmagan dayon ang biktima dayong hansak sa kutsilyongadto sa tuong bahin sa dughan sa biktima, dayon mikabad og dagan pahilayo sa maong lugar.

Maayo nalang kay ang suspek nasugatan sa kapolisan ug naposasan dayon, samtang ang biktima gidala dayon sa Cebu City Medical Center.   (Lesley Caminade)    (BANAT NEWS)