Granada pwedeng kasohan - Almendras

CEBU, Philippines - Mahimong kapasakaan og kaso si Demetrio Granada niining pag-insister niya nga siya’y mayor sa lungsod sa Tudela, sa isla sa Camotes human ipadayag pag-usab sa Department of Interior and Local Government (DILG) nga si Rogelio Baquerfo mao gihapon ang ilang giila nga lihitimong mayor sa lungsod.

Mao kini gipadayag ni manlalaban Danilo Almendras, ang legal counsel sa DILG-7 dihang na-interview sa usa ka estasyonan sa Radyo isip reaksiyon ning padayong kagubot sa maong lungsod tungod sa pag-inilogay nila ni Granada ug Baquerfo sa lingkoranan sa pagkamayor sa maong lungsod.

Matud ni Almendras nga mahimong kapasakaan og kasong ‘usurpation’ si Granada kun ipamugos gyud niini ang pagpamirma sa mga transaksiyon sa balay lungsod ilabina na sa mga tseke, tungod kay nagpabilin pa gihapong si Baquerfo maoy kasamtangang giila nila nga mayor sa lungsod.

Gipasabot ni Almendras nga si Granada wala ilhang mayor tungod sa kapakyas niya sa pagkuha og writ of execution sa korte aron pormal na kining makaasumir sa katungdanan.

Matud ni Almendras dili pa igo ang motion for execution pending appeal nga nakuha ni Granada gikan sa sala ni RTC Judge Edito Enemisio gumikan kay nagkinahanglan pa kini og writ of execution. Kini samtang nagpabilin pang napundo karon sa Comelec en banc ang motion for reconsideration sa kampo ni Baquerfo human ikaproklamar nga midaug sa election protest si Granada.       (BANAT NEWS)