Tanggol di pasagdan hataga'g abogado

CEBU, Philippines - Wala biyai sa kapulisan sa dakbayan sa Sugbu si PO2 Ramil Tanggol sa giatubang niining kaso pagkapatay sa iyang dinakpan nga si Mark Anthony Generali sulod sa karsel sa Waterfont Police Station niadtong Domingo sa kaadlawon.

Kini maoy giklaro sa hepe sa kapulisan sa dakbayan sa Sugbu, Sr. Supt. Patrocinio Comendador bisan sila maoy mipasaka og kasong homicide batok kaniya kagahapon sa hapon.

Si Comendador mipasabot nga ang pagpasaka’g kaso wala magpasabot nga ila nang gipasagdan ang maong police kini tungod kay hatagan gihapon nila kini og legal assistance.

Hinuon ang maong legal assistance ila pang i-rekomendar ngadto sa Cebu City government. Ang CCPO ug ang CH dunay memorandum of agreement kaniadto nga mohatag ang dakbayan og abogado sa mga polis nga makasuhan samtang nagpatuman sa ilang trabaho.

Ang dakbayan mosusi pa hinuon kun angayan bang hatagan og legal assistance ang maong polis ug kini diha basehan sa sirkumstansya.

Ang maong legal assistance kutob sa kasong atubangon sa matag polis administratiba man o kasong kriminal nga atubangon sa nahisgutang police.

Ang hepe sa Homicide Section Sr. Insp. Mario Monilar nga gikahinabi sa Banat News nagkanayon nga homicide ang ilang gipasaka tungod kay tataw man usab nga aduna kini kasaypanan nga nahimo nga miresulta sa kamatayon ni Generali. Gipasabot niini nga anaa nalang unya sa piskaliya sa pag-evaluate sa maong kaso.

Sa imbestigasyon sa kapolisan gikatahong giilog ni Generali ang service firearm ni Tanggol dihang iyaha unta kining ipagawas sa detention cell aron dalhon sa Cebu City Medical Center (CCMC) alang sa liquor test hinungdan sa ilang panaglayog ug mibuto ang pusil tumong sa agtang sa biktima. (Guam Logroño) (BANAT NEWS)