Lain nasad nga sikyu nakaaksidente

CEBU, Philippines - Lain na usab security guard ang mag-atubang og kasong reckless imprudence resulting in physical injury human aksidenteng mibuto ang service firearm nga shotgun niini ug nakaangol og tulo ka mga empleyado sulod sa Granduke Lending Corporation kagahapon sa buntag diha may J. Luna Avenue barangay Mabolo.

Ang maong security guard giila sa kapulisan nga si Clyde Villardal, 21, taga Cabantan barangay Luz, sakop sa Extreme Force Security Service Agency.

Ang mga nangaangol nga empleyado mao sila si Dominique Maratas, 25, taga Nasipit Talamban, collector sa maong lending firm; Jeanylyn Abejar, 25, stay-in office clerk ug Rommel Bagongon, 31, collector ug taga Pajac dakbayan sa Lapulapu nga pulos naigo sa splinters diha sa ilang mga tuhod.

Si Maratas maoy gihulagway sa kapolisan nga nagrabehan og samad diha sa duha ka tuhod niini.

Sumala pa ni SPO1 Jay Yballe ang chief investigator sa Homicide Section sa Cebu City Police Office nga gikahinabi sa mga tigbalita nga nakablitan sa suspek ang shotgun nga iyang gikuha diha sa kahera.

Ang gwardiya mitug-an nga nianang milabay’ng gabii iyang gibilin ang maong armas apan iyaha kining gikuhaan og bala, kagahapon dihang iyaha na kini gikuha og balik alang sa pag-duty wala siya makabantay nga duna pay nahabiling usa ka bala diha sa sulod niini.

Ang mga biktima nga pulos naa sa sulod naigking sa pagbuto ug nakabantay nalang nga pareho na silang nangasamdan ug daling gidala sa pribadong tambalanan.

Ang security guard nga nahinabi sa mga tigbalita nagkanayon nga aksidente lang gyud ang nahitabo tungod kay wala siya magtoong duna pay usa ka balang nahibilin ug iya pa gyung nakablitan.

Samtang ang hepe sa kapulisan sa dakbayan sa Sugbu ang nipadayag nga mo-rekomendar sila ngadto sa Regional Security Agency Guards and Supervisory Unit sa PRO-7 nga ipaubos gyud sa pagbansay-bansay ang mga security guard.

Kini tungod kay iyang nakita nga kulang gyud sa proper firearm safety ang mga gwardiya hinungdan nga nagsunod-sunod na karon ang mga aksidenti sa incidental firing nga naglambigit og mga security guard.

Niadtong Lunes sa udto, usa ka security guard sa usa ka mall sa dalan Sanciangko nga si Abraham Duran ang nakaangol og tulo ka sibilyan human aksidenteng nakablitan ang iyang service firearm nga .9mm pistol.   (BANAT NEWS)