CEBU, Philippines - Usa ka 10-anyos nga batang lalaki, ingon man inahan niini ug laing sibilyan ang nangaangol human aksidenteng mibuto ang service firearm sa gwardiya sa usa ka mall diha sa dalan Sanciangko kagahapon sa udto.
Ang nalandig sa tambalanan si Geraldine Cansul, anak niining si Kolt David pulos taga barangay Sawang-Calero ning dakbayan ug usa ka Jason Luriana, taga barangay Lawaan sa dakbayan sa Talisay kinsa pulos nangaigo og splinters.
Si Geraldine naigo sa tiyan samtang ang bata naigo sa liog. Si Luriana naigo usab sa bukton ug pulos gidala sa pribadong tambalanan.
Samtang ang security guard nga gitanggong na sa Homicide Section mao si Abraham Duran, 43, taga Sabang dakbayan sa Danao sakop sa Unisave Security Specialist Agency.
Si SPO1 Jay Yballe, chief investigator sa Homicide Section sa CCPO nagkanayon nga ilang kasuhan si Duran og reckless resulting to physical injury tungod sa pagpabaya sa iyang katungdanan.
Si Duran mitug-an sa mga imbestigador sa kapulisan nga nagdali siya aron makapaniudto apan dihang iyaha nang ideposito ang .9mm pistol sa kauban iyaha kining gitangtangan og magazine apan aksidenteng nakablitan ug nibuto kini diha sa ubos.
Ang naigong sementadong sawog nangalagpot sa mga biktima nga naatol sa pag-agi duol kaniya. (BANAT NEWS)