Mini bus gisuspenso sa LTFRB

CEBU, Philippines - Gisuspenso og 30 ka adlaw sa Land Transportation Franchising and Regulatory Board (LTFRB)-7 ang prangkisa sa EDC Mini Bus Liner nunot sa nahitabong aksidente sa kadalanan niadtong Sabado sa kaadlawon nga mikalas og 14 ka mga tawo human kini misungag sa usa ka container truck.

Si Regional director Romulo Bernardez mitug-an nga ilahang gipatuman ang 30-day preventive suspension sa tanang minibus sa EDC Liner aron masigurong luwas ang mga sumasakay niini samtang gipahigayon ang imbestigasyon.

Ang LTFRB-7 ug Land Transportation Office-7 pinanguluhan ni director Raul Aguilus nagtambayayong sa paghimo og administratibang imbestigasyon kabahin sa nahitabong aksidente.

Matud ni Bernardez ang mga sakyanan sa EDC Liner ilaha usab ipaubos sa road worthiness examination samtang ang mga drayber niini di makabalik og maneho kun dili mapaubos sa road safety education.

Tumong ug tuyo niini mao ang pag-edukar kanila alang sa luwas nga pagmaneho sa ilang mga buses nga gipanag-iya sa EDC Liner.

Gitataw si Bernardez nga ang ilang gibasehan sa imbestigasyon mao ang executive order number 202 nga nagtugot sa chairman sa LTFRB nga mopahamtang og preventive suspension niadtong mga transport companies o operators nga malambigit og aksidente.

Isip direktor sa maong buhatan duna siya'y gahom aron moimplementar niini ngadto sa mga operators.

Gihimo kini ni Bernardez ang pagpasabot tungod sa pagkwestyon niini sa presidente sa mga minibus ug operators nga si Julie Flores kun nganong walay due process ang pagpahamtang sa 30 ka adlaw'ng suspension.

Gikwestyon ni Flores ang preventive suspension sa EDC Liner tungod kay wala pay pormal nga imbestigasyon nga gihimo batok sa maong operator kabahin sa maong aksidente.

Matud pa ni Bernardez nga tipik ug kabahin kini sa ilang tahas nga ma-protektahan ang kaluwasan sa mga sumasakay ug miawhag kang Flores nga kinahanglang ilahang madisiplina ang ilang mga miyembro ilabi na sa mga abusadong mga drayber.

“Dili nato pwedeng i-compromise ang road safety sa atong riding public,” pasabot pang Bernardez, ug midugang nga sa pag-serve sa suspension kagahapon ilaha usab temporaryong kumpiskahon ang mga license plates sa pito ka mga mini buses sa EDC.

Ang LTO-7 sumala pa ni Bernardez maoy mohimo sa eksaminasyon sa road worthiness sa mga sakyanan sa EDC ug human sa 30 ka adlaw'ng suspension mahimo anha pa sila morekomendar kung kanselahon ba ang prangkisa o tugutang makabalik og operate ang EDC.

Niadtong milabay'ng Domingo, laing minibus sa EDC ang nakadumbol og 3-anyos nga bata diha sa dalan Natalio Bacalso Ave. nga miresulta sa kamatayon niini.

Mipasabot hinuon si Bernardez nga mahimong maka-file ang tag-iya sa EDC Liner og motion alang sa paglibkas sa preventive suspension kun sa higayon mahuman na ang pag-eksamin sa LTO-7 sa ilang mga sakyanan. (BANAT NEWS)