Cortes misilot sa mga iro

CEBU, Philippines - Gihuwes de kutsilyo ni Mayor Jonas Cortes sa dakbayan sa Mandaue pinaagi sa pagsilot sa kamatayon ang kaliboan ka mga libudsuroy nga mga iro sa maong dakbayan .

Ang gas chamber nga maoy gigamit aron pagkutlo sa kinabuhi sa maong mga hayop tua mahimutang sa city pound sa barangay Labogon, dakbayan sa Mandaue.

Naupsan na sa pailob si Cortes sa kagahi mopatuo sa mga tag-iya sa maong mga iro sa mga pagbadlong nga gihimo sa kagamhanan batok sa mga iro nilang binuhian sukad pa sa miaging tuig.

Matud pa ni Cortes nga maayo man ang magbuhi og iro, apan kinahanglang hiktan kini sa tag-iya ug pabakunahan usab og anti-rabies aron luwas kini sa makamatay nga kagaw.

Daan nang kampanya sa kagamhanan ang pagpakigbatok sa rabies gumikan sa kadaghan nang nakabsan og kinabuhi ning maong matang sa kagaw nga mugna sa pinahitan sa iro.

Apan namatngonan sa mayor nga mao ra og walay bili sa mga tag-iya og iro ang maong pasidaan sa kagamhanan hinungdan nga milusad si Cortes sa iyang walay kukaluoy nga lakang sa pagsilot og kamatayon sa mga iro nga madakpan sa mga tinugyanan sa city pound.

Si Gerlyn Muano, in-charge sa city pound sa barangay Labogon sa maong dakbayan miingon nga sukad ilusad nila ang hugot nga dinakpanay sa mga libudsuroy nga iro sayo ning tuiga tulo pa ka hayop ang gilukat sa mga tag-iya.

Si Muano miingon nga dili lang kay ilang gihingusgan ang pagpanakop ug pagpamatay sa libudsuroy nga mga iro sa kabarangayan kundili ang information drive ug awareness program batok sa rabies ila usab nga gihimo.

Kini aron sa paghatag og kasayuran sa mga molupyo labot sa ordinansa sa dakbayan nga nagpatuman sa Anti Rabies Act of 2007.   (BANAT NEWS)