PO2 Tanggol gipasakaan og kaso

CEBU, Philippines - Kasong reckless imprudence resulting to homicide ang ipasaka sa kapulisan sa dakbayan sa Sugbu batok kang PO2 Ramil Tanggol kinsa nakapusil-patay sa usa ka dinakpan sulod sa detention cell sa Waterfront Police Station niadtong Domingo sa kaadlawon.

Nasayran nga dead on arrival sa Cebu City Medical Center si Mark Anthony Generali human maigo sa tunga-tungang bahin sa iyang ilong ug mata dihang napusilan ni Tanggol.

Si Tanggol nangangkon nga gisuwayan og ilog ni Generali ang iyang pistolang .9mm dihang iyaha unta kining dad-on sa CCMC alang sa liquor test.

Ang hepe sa kapulisan sa dakbayan sa Sugbu Sr. Supt. Patrocinio Comendador nga nahinabi sa mga tigbalita nagkanayon nga subay sa proseso, kasuhan gyud nila si PO2 Tanggol ug ang piskaliya na maoy modesisyon niini.

Si Comendador nagkanayon nga iya nang gimanduan ang Internal Affairs Service (IAS) sa Cebu City Police Office sa pag-imbestigar sa kasong administratiba batok kang PO2 Tanggol samtang mag-atubang kini’g kasong kriminal sa korte.

Sumala pa niini nga pinaagi sa imbestigasyon masuta usab ang tinuoray’ng nahitabo sa insidente.

Gipasabot niini nga lisod usab kaayong tuohan nga diretsohon lang pasangil sa mga kabanay nga dunay foul play sa nahitabo tungod kay walay mga tawong nakakita niini hinungdan nga mag-depende nalang unya kini sa dagan sa imbestigasyon.

Gibutyag niini nga human unya ma-evaluate sa IAS ang kasong administratiba ilahang hatagan og kopya ang kagamhanan sa dakbayan sa Sugbu aron pagtan-aw kun ilaha bang matabangan og abogado si Tanggol.

Subay niini iyang giklaro nga kun makapiyansa man gani si PO2 Tanggol sa maong kaso iya pa usab susihon kun angayan pa ba kining ipabilin sa Waterfront Police Station o ibutang sa laing unit sa CCPO. (Guam Logroño)   (BANAT NEWS)