17-anyos gipusil namatay

CEBU, Philippines - Patay nang nadangat sa tambalanan ang usa ka 17-anyos nga lalaki human gipusil samtang paingon na untang mopauli kauban sa mga barkada niini sa sitio Sta. Ana Poblacion siyudad sa Toledo niadtong Lunes sa 1:20 sa kaadlawon.

Ang biktima mao si Ikhan Deiparine, 17, molupyo sa sitio Kiner Poblacion samtang ang suspek wala pa mailhi sa kapulisan sa paghimo ning balita.

Matud ni SPO3 Gil Lastimosa sa Toledo City police dihang nahinabi sa Banat News ang biktima kauban sa iyang mga barkada nanglakaw pauli gikan nga nanuroy apan pag-abot sa maong lugar kalit lang kining gipusil sa laing grupo sa mga batan-on gamit ang wala pa matino nga kalibre sa armas.

Ang biktima nakaangkon og samad pinusilan sa tiyan ug gidali pagdala sa Toledo City District Hospital apan tungod sa seryoso nga kahimtang gibalhin dayun sa Vicente Sotto Memorial Medical Center (VSMMC) apan gideklarar nga dead on arrival.

Ang kapulisan padayun pa sa ilang imbestigasyon pagtumbok sa suspek ug sa motibo sa krimen apan gidudahan nga may kalambigitan kini sa panagbangi sa mga batan-on sa maong lugar nga nagpasakop og lain laing fraternity. (Darrel Carumba)    (BANAT NEWS)