Milugos ug mipatay sa 13 anyos kasohan na

CEBU, Philippines - Mga kasong pagpanglugos ug pagpatay maoy ipasaka batok sa unom ka mga dinakpan sa kapolisan sa dakbayan sa Lapulapu karong adlawa ngadto sa buhatan sa piskaliya sa siyudad, batok sa unom ka mga dinakpan nila sa kasong pagpanglugos ug pagpatay sa usa ka 13-anyos nga dalagita niadtong Miyerkules sa gabii didto sa sitio Lukata, barangay Looc, Lapulapu City.

Kini ang nasayran sa Banat News kagahapon gikan kang SPO4 Rolito Jumao-as sa homicide section sa kapolisan sa maong dakbayan.

Matud pa ni SPO4 Jumao-as nga ang ilang pasakaan sa maong kaso mao ang 19 anyos nga si Victorio Oyames.

Mahinumdoman nga ang 13-anyos nga biktima giingong sakop sa Youngster ug giunay ra sa mga suspetsado nga kauban niya sa grupo.

Ang biktima namatay gumikan sa 70 ka mga samad dinunggaban sa iyang lawas nga agi sa Batangas knife ug ice pick nga hinagiban.

Si Senior Superintendent Mariano Natuel, hepe sa kapolisan sa maong dakbayan nagkanayon nga sa unom ka suspetsado, ang kasong rape with homicide in relation sa Republic Act 7610, adto ipasaka batok kang Oyames, kay siya ra may maisip nga hamtong sa maong grupo.

Ang laing duha nga nagpanuigon og 16 ug 17 anyos, ipaubos pa sa pag-atiman sa Department of Social Welfare and Development (DSWD).

Samtang ang laing tulo, diin duha kanila nag-edad pa og 14, samtang ang usa 13 anyos pa, itugyan nila kini sa hingpit nga pag-atiman sa DSWD kay mga minor pa man ang panuigon niini.

Si Supt. Natuel miingon nga wala magkatakdo ang mga pamahayag sa mga suspetsado dihang iyang gisukit-sukit kun naggamit ba kini og rugby niadtong paghimo nila sa krimen.

Maoy miingon nga wala sila mogamit og rugby kay gidili sa ilang kapungonan ang paggamit og ginadiling drugas, samtang may miangkon usab pulos sila migamit og rugby dihang ilang gilugos ug gipatay ang 13 anyos nga biktima. - BANAT NEWS