Earth Hour milampos

CEBU, Philippines - Gihulagway ni Cebu City Councilor Nestor Archival nga malampuson ang pagpahigayon sa “Earth Hour” niadtong miaging gabii dinhi sa Sugbu.

Si Archival nga maoy chairman sa Committee on Environmental Management sa City Council miingon nga positibo ang tubag sa mga business establishments sa maong kalihukan.

Partikular nga ginganlan ni Archival nga namawong og suga ang SM City Cebu, Ayala, Club Ultima gawas pa sa Cebu City Hall.

Matud sa konsehal nga ang ilang gipaabot karon mao na lang ang report gikan sa National Power Corporation (NPC) ug sa Visayan Electric Company (VECO).

Kini aron sa pagsuta kung pila ka megawatts ang nadaginot atol sa pagpawong sa sugang dagitabnon niadtong miaging gabii.

“Kung mahibaw-an nato kung pila ka megawatts ang na-save, mahibaw-an na nato kung pila ka thousand tons of carbon dioxide ang na-reduce,” sumala ni Archival.

Target sa konsehal nga makadaginot sa maong kalihukan ang dakbayan og 5 ngadto sa 10 megawatts (10 million watts).

Ang nahisgutang kalihukan gisugdan niadtong tuig 2007 sa Sydney, Australia nga gisalmutan og kapin 2 milyones ka households ug business establishments. - BANAT NEWS