LTO chief makigtagbo sa transport groups

CEBU, Philippines - Gikatakdang makigtagbo si Land Transportation Office (LTO) Chief Arturo Lomibao ngadto sa mga transport operators sa Sugbu niining semanaha.

Kini maoy gibutyag ni Konsehal Sylvan Jakosalem, ang chairman sa Committee on Transportation sa City Council nga nahinabi sa Banat News.

Matud ni Jakosalem gustong maminaw ni Lomibao sa sentimiyento sa transport groups sa Sugbu labot sa gipatas-ang bayranan sa mga traffic violations.

Hugot nga misupak ang nagkadaiyang transport groups sa Metro Cebu pagpataas sa multahan hinungdan sa paglusad nila og welga tungod kay alang kanila dili kini makatarunganon ilabi na karong panahon sa krisis.  

Gipaabot pa ni Konsehal Jakosalem nga personal nga mapadangat ang yangungo sa mga transport group ngadto ni Lomibao.

Si Jakosalem maoy nangita og dapit aron mapahigayunan sa dialogue karong umaabot nga adlaw'ng Huwebes.

Una niini, mibahad ang nagkadaiyang transport groups paglusad og laing welga karong Biyernes tungod gihapon sa nahisgutang reklamo bisan paman sa hulga sa dakbayan nga tangtangan sila og prangkisa.

Labing minus 13 ka mga jeep de pasaheroan ang nalista sa Citom nga gigamit sa pagpahigayon og welga sa mga driver niadtong miaging Marso 16. - BANAT NEWS