Motor sa namadlong sa kawatan gikarnap

CEBU, Philippines - Gikarnap sa duha ka mga kawatan ang motorsiklo sa usa ka tawong nakasakop sa ilang pagpangawat og bateriya sa sakyanan didto sa Sitio Mustang, Brgy. Pusok, dakbayan sa Lapulapu kagahapon sa kaadlawon. Ang biktima mao si Rey Bariso Ybañez, 28, minyo, nga taga Mustang.

Matud pa ni SPO4 Melchor Amit, desk officer sa Lapulapu Police Station nga mga ala 1:00 kagahapon sa kaadlawon mao pay paghiabot ni Ybañez sa ilang panimalay dihang iyang nakita ang duha ka wala hiilhing tawo nga misuway nag kawat sa bateriya sa multicab sa ilang silingan.

Busa gidali niya pagpukaw ang tag-iya sa bateriya aron mapakgang ang maong mga kawatan.

 Apan puwerting dimalasa kay wala gyud kini makamata, busa iyang gibadlong ang mga kawatan, apan misamot ang iyang kadimalas kay milanit sa armas ang usa sa maong mga kawatan   ug gitirohan dayon siya niini.

Apan bisan og dimalas siya, may pagkadibuwenas usab kay wala siya maigo sa duha ka mga bala sa kawatan.

Apan nakaangkon man siya og debuwenas , misamot lang gihapon ang iyang kadimalas kay sa kalagot sa mga kawatan nga wala makakawat sa bateriya ug wala makaigo kang Ybanez, ang motorsiklo sa naulahi maoy gisakiyo. Busa hayahay kaayo ang maong mga kawatan sa ilang pag-ikyas kay imbis bateriya ray kawaton, motorsiklo na gyud hinoon maoy ilang nadala nga nagkantidad og P41 mil.

  Hinuon padayon pang gipangita sa kapolisan ang maong mga karnaper. - Bong Soriano (BANAT NEWS)