Camputhaw nag-una sa dengue

CEBU, Philippines - Nag-una na karon ang Camputhaw sa 80 ka mga barangay sa dakbayan sa Sugbu sa pinakadaghan og kaso sa dengue niining tuiga. Kini maoy gibutyag ni Dorenda Macasucol, ang dengue coordinator sa City Epidemiology Surveillance and Statistics Unit (CESSU) sa City Health Department.

Matud ni Macasucol nga ang barangay Camputhaw adunay 17 ka dengue cases sukad sa buwan sa Enero hangtud niadtong Marso 21 ug usa sa mga biktima ang namatay.

 Nagsunod sa Camputhaw sa pinakadaghan og kaso sa dengue mao ang barangay Guadalupe nga adunay 12 ka kaso ug usa usab ang patay.

Naglangkob sa top 5 mao ang Carreta nga dunay 11 ka kaso, 11 usab sa Labangon ug usa ang patay, samtang 9 sa Lorega San Miguel ug usa ang patay. Gipadayag hinoon ni Macasucol nga padayong miminos ang mga kaso sa dengue niining tuiga itandi sa ilang natala sa miaging tuig.

Sukad sa Enero niining tuiga hangtud niadtong Marso 21 ang CESSU naka-monitor lang og 202 ka dengue cases sa siyudad ug unom ang patay.

 Samtang sa miaging tuig sa susamang period, ang CESSU nakalista og 363 ka kaso ug 18 usab ka kinabuhi ang nakalas sa nahisgutang sakit.

28 lang usab ka dengue cases ang natala sa CESSU niining buwana ug pulos naluwas itandi sa buwan sa Marso sa miaging tuig nga dunay 67 ka kaso ug pito ang patay. - Elly Bolonos (BANAT NEWS)