Imbestigasyon sa lamppost hapit na mahuman

CEBU, Philippines - Hapit na mahuman ang Visayas Ombudsman (OV) sa subling pag-imbistigar sa gikagubtang kaso bahin sa mga lamppost ug sa dili madugay mokagulkol na sa bilanggoan kadtong mga makasasalang opisyal sa gobiyerno.

Sumala pa sa pangulo sa investigation panel sa OV nga si Engr. Roderick Blazo nga nagpanikad na sila nga mahuman na nila ang subling imbistigasyon aron kasilotan sa labing dali nga panahon ang mga nalambigit nga mga opisyales sa kagamhanan sa maong anomaliya.

Si Blazo nagkanayon nga halos kompleto na ang ilang katulo na balikbalikang imbistigasyon batok kang kanhi Mandaue City Mayor Thadeo Ouano ug ubang mga opisyal sa Mandue, Lapulapu City Mayor Arturo Radaza ug mga kaubanang opisyal sa Lapu-lapu, DPWH-7 officials ug supplier sa lamppost.

Ang nahisgutang mga opisyal pulos gipasanginlang nalambigit sa gipaburotang presyo sa mga lamppost nga gipanarok sa daplin sa kadalanan sa mga dakbayan sa Lapulapu, Mandaue ug Cebu niadtong gipahigayong 12th Asean Summit sa tuig 2006. Nasayran nga ang maong matang sa lamppost nga gipanarok sa plaza sa City of Naga tag P10,000 ra, apan niadtong Asean summit gipresyohan na ang matag usa niini og tag   P80 mil pataas.

Busa miingon si Blazo nga gamay nalay kuwang, aduna nay mokagulkol sa bilanggoan karong pipila ka adlaw nga umaabot kay hapit naman makompleto ang mga panginahanglan sama sa paghimo og information sa kaso ug pagpapirma sa Ombudsman.

Miingon siya nga inighuman niini , ibalik na usab kini ngadto sa Sandiganbayan uban na ang lig-on na kaayong mga ebindensya batok sa mga akusado.

Matud pa ni Blazo nga hayan sa una o ikaduhang semana sa bulan sa Abril makompleto na ang ilang reinvestigation unya iduso dayon kini pagbalik ngadto sa Sandiganbayan ug mosunod na ang pagpakanaog og hukom aron karselon kadtong mga opisyal nga mamatud-ang nakalapas sa balaod bahin sa overpricing. -  BANAT NEWS