Bank managers sa Legacy ikiha

CEBU, Philippines - Ang kontrobersiyal nga tag-iya sa nabangkarutang mga bangko ubos sa Legacy Group of Companies nga si Celso delos Angeles mopasaka og kaso batok sa mga opisyales sa iyang mga bangko.

Ang abogado ni delos Angeles dinhi sa Sugbu nga si Atty. Inocencio dela Cerna miingon nga ang iyang kliyente mokiha sa mga opisyales sa rural banks nga iya sa Legacy Groups.

Kini aron mapakita sa publiko dinhi sa Sugbu nga si delos Angeles wala gyuy kalambigitan sa anomaliya sa Legacy nga niresulta sa pagpanira sa maong mga bangko.

Gipasabot ni dela Cerna nga wala mopagawas og verbal o written order si delos Angeles nga molusad og mga programa pagdani sa mga depositors sama sa baniog na kaayong ‘double your money scheme.’

Apan ang nahitabo nangalugi ang ilang mga bangko ug napakyas ang gisaad sa maong mga opisyales nga madoble ang deposito sa mga depositors hinungdan nga adto gibasol tanan sa iyang kliyente.

Kini maoy hinungdan nga pasakaan ni delos Angeles og kaso ang mga opisyales sa bangko pagmatuod nga dili kini maoy responsable sa maong binuang.

Nagdumili pa hinuon sa pagtug-an si dela Cerna kun kanus-a ipasaka ang kaso dinhi sa Sugbu.

Samtang ang pipila sa mga depositors ug pre-need clients sa Legacy dinhi sa Sugbu mibahad nga mosang-at og kaso batok kang delos Angeles. - Chester Abadilla (BANAT NEWS)