Pagpatuman sa gun amnesty gihangop

CEBU, Philippines - Gihangop ni Cebu City Councilor Raul Alcoseba ang nahuna-hunaang lakang sa Philippine National Police (PNP) pagpatuman og laing gun amnesty sa dili pa ang eleksyon sa sunod tuig.

Tumong sa kapulisan niini nga makontrolar ang dili lisensyadong mga armas de fuego ug maminusan usab ang mga election-related incidents sa umaabot nga piniliay.

Matud ni Alcoseba nga angayang ipatuman ang laing gun amnesty tungod sa iyang pagtoo nga daghan gihapon karon ang dili lisensyadong mga armas de fuego sa nasud.

Basi sa pagbana-bana sa PNP, aduna pay labing minos 40 mil ka mga loose firearms dinhi sa nasud nga naglakip sa Sugbu.

Katapusang gipatuman sa kapulisan ang gun amnesty niadto pang Nobiyembre 14, 2006 hangtud sa Nobiyembre 13 niadtong 2007.

Nagtuo si Alcoseba nga daghan ang mopahimulos sa maong programa ilabi na niadtong mga tawo nga bag-o lang nakabaton og armas.

Ang konsehal nga maoy vice chairman sa Committee on Public Order and Safety sa City Council mipasalig pagsuporta sa plano sa PNP

Ang nahisgotang lakang giingong nanginahanglan pa hinoon og pagtugot gikan sa presidente una ikapatuman sa kapulisan.

Sa susamang kalamboan pabor usab si konsehal Alcoseba sa laing plano sa kapulisan pagpatuman og total gun ban panahon sa eleksyon sa sunod tuig.

Kung kini mahinayon, lakip unya nga did-an pagdala og armas mao ang mga kandidato, mga opisyal sa gobyerno ilabi na ang mga sibilyan.

Gipadayag hinoon ni Alcoseba nga bisan kung siya pabor niini, apan ang konsehal nagduda kung kini hingpit ba nga ikapatuman sa kapulisan.

Apan taliwa niini gihangop gihapon sa konsehal ang nahuna-hunaang lakang sa PNP alang sa pagkab-ot sa malinawong pagpahigayon sa piniliay sa sunod tuig.  - Elly Bolonos (BANAT NEWS)