Gimingaw sa inahan naghikog

CEBU, Philippines - Nagbitay nalang ug wala nay kinabuhi dihang nakit-an sa maguwang ang iyang manghod sa ilang kusina kagahapon sa kaadlawon sa barangay Candaguit lungsod sa Sibonga.

Si Marvin Abucejo, 18, nakit-an sa iyang maguwang nga si Margarrette Abucejo nga nagbitay sa kusina ug wala nay kinabuhi ug wala na matabang.

Matud pa ni Kapitan Maximo Rigodon sa barangay Candaguit sa pakighinabi sa Banat News ang amahan ni Marvin nga si Romeo Abucejo nagkanayon nagbilin og usa ka suicide note ang biktima nga nagkanayon nga nasagmuyo kini sa iyang inahan nga dugay nang wala niuli sa ilang panimalay.

Dugang pa sa kapitan nga sa wala pa ang hitabo kanunay nang maghisgut ang namatay nga gimingaw na kini sa ilang inahan nga pila na ka tuig wala mopakita kanila.

Nasayran nga usa ka domestic helper sa Saudi Arabia ang inahan sa namatay ug nabalik niadtong 2005 apan human mopakita og makadiyot kanila mibiya kini ug wala na mobalik.

Matud pa sa maguwang sa namatay nga sukad nawala ang ilang inahan, wala nay direksyon ang kinabuhi sa iyang manghod ug kanunay nalang kining wala sa kaugalingon ug magpunay og pamarkada.  - Lesley Caminade (BANAT NEWS)