Opisyal gipasanginlang nangayo'g sakyanan

CEBU, Philippines - Duha ka mga reklamante ang mipatim-aw sa buhatan sa BID-7 ug usa niini mipasangil sa usa ka dakong opisyal sa BID-7 nga nangayo og duha ka sakyanan kaniya bugti sa pagbasura sa kaso niining giatubang sa BID-7.

 Ang unang miakusar mao si Atty. Kim Mendoza ang abogado sa Japanese national nga si Hideo Kikuchi.

Matud pa ni Mendoza sa milabay’ng Septiyembre 2008 miduol si Kikuchi sa BID-7 alang sa pag-extend sa iyang pagpundo dinhi apan kini gikatahong gi- hold sa maong opisyal (pangalan gipugngan) gumikan kay overstaying na ang Hapones ug nawagtang sad sa Hapones ang passport niini.

Matud pa ni Mendoza gipadad-an si Kikuchi sa maong opisyal og text message ug mihulgang ipaubos kini sa deportation proceedings kundili ihatag ang iyang Pajero ug Mercedez Benz ngadto kaniya.

Laing mipasangil og kahiwian sa maong opisyal mao ang magtiayong Ron ug Elizabeth Rodis, matud pa sa duha, sa milabay’ng bulan sa Enero ning tuiga gipangayoan sila niini og P15 mil alang sa renewal sa ilang dual citizenship.

Dihang wala sila makatuman niini gikatahong gipugngan sa maong opisyal ang maong mga papeles, nahibulong sila si Rodis sa kadako sa gipangayo niini nga ang bayrunon sa package sa renewal P2,500 ra man.

Gumikan niini midangop sila ni Rodis sa buhatan sa NBI-7 ug gikatakda unta kining ipa-entrap sa mga ahente apan sa wala masayring hinungdan mitawag ang maong opisyal kanila ug gibakwi ang nahaunang gipangayong P15 mil ug pabayron nalang sila og P1,500 ug laing P1,000 alang sa bayranan sa express lane sa BID.

 Sa pagsuwat ning balita gisuwayan sa Banat News pagkuha ang habig sa maong opisyal apan napakyas ang maong tinguha.

Ning bag-uhay lang nagkaguliyang ang mga opisyales sa maong buhatan human magtinubagay og kiha sa usa’g-usa tungod sa pasangil nga dunay kahiwiang gipanghimo. -  BANAT NEWS