CCPO-SWAT may bag-ong gamit
CEBU, Philippines - Gihatagan og mga bag-ong kagamitan ang mga sakop sa Special Weapon and Tactics (SWAT) team sa Cebu City Police Office.
Ang SWAT team gihatagan og napulo ka bullet-proof vests, napulo ka goggles, napulo ka ballistic helmets ug usa ka ballistic shield nga giingong nagkantidad og P700 mil.
Matud pa ni Mayor Tomas Osmeña gikinahanglan ang nahisgutang mga kagamitan ilabi na kung dunay operasyon o rondahon ang kapulisan.
“Because we have several incidents in the past where the guy who knocks on the door get shot, very clearly it is needed,” sumala ni Osmeña.
Usa sa tukmang sanglitanan sa pamahayag sa mayor mao si PO1 Noriel Luage nga napusilan dihang niuban sa pag-serve og search warrant diha sa panimalay sa gitumbok nga “middleman” sa mga gun-for hire dinhi sa Metro Cebu nga si Ramon Baclohan niadtong tuig 2007.
Napusilan usab hinoon ang suspetsado ug namatay apan wala usab matabang si Luage ug nakabsan usab sa iyang kinabuhi.
Ang hepe sa SWAT team nga si Chief Insp. Arnel Banzon maoy nidawat sa maong mga ekipo ug mapasalamaton sa city government sa maong kagamitan.
Matud ni Banzon nga dili na unya magpanagana ang iyang mga sakop pagtubag sa mga alarma tungod sa maong mga bullet-proof equipment. - Elly Bolonos (BANAT NEWS)
- Latest
- Trending
