Mga taxi apil na sa rekisahon

CEBU, Philippines - Kapolisan sa syudad sa Sugbo mihingusog sa pagpahigayon og checkpoints sa kadalanan gumikan sa pagsiaw sa mga tulis karon sa kadalanan lakip na ang pagpatay sa ilang mga biktima.

Sukwahi sa naandan, ang kapolisan miapil na og rekisa sa mga pasahero sa mga taxi diha sa mga checkpoints ilabi na niadtong mga unit nga kalalakin-an ang mga pasahero.

Si Police Inspector Richard Diaz, hepe sa Waterfront Police Station sa pakighinabi sa Banat News nagkanayon nga   ang ilang gipahigayon og checkpoint alang usab sa safety sa mga drivers ilabina sa mga nag-drive og taxi.

Sa miaging gabii sa ilang gipahigayon nga checkpoint daghan kaayo sila og nadawat nga positibong reaksyon gikan sa mga taxi driver nga ilang gipahunong.

Ug sa pasahero usab malipayon usab ang mga pasahero aron usab mahipos ang mga kawatan sa Sugbo.

Samtang nasuta usab nga daghan nang mga emergency blue lights sa ibabaw sa taxi units ang di na magamit, duna say mga drayber nga wala gani katultol sa switch niini.

Ang emergency blue lights ideya sa kanhi director sa Cebu City Police Office nga si Supt. Melvin Gayotin dihang misiaw ang pagpanulis sa mga taxi ug jeepney sa dakbayan, pipila sa mga taxi driver gipamatay usab niadtong mga tuiga.

Mipahimangno si Diaz sa mga taxi drayber nga mag-amping sa pagpili sa mga pasahero tungod kay bisan paman sa checkpoints nga ilang ibutang duna gihapoy pamaagi ang mga tulisan nga buhaton ang ilang krimen.

Usa sa mga napanglantawang risgo sa mga drayber sa paghatud sa mga pasahero mao nga ang mga pasahero maoy magbuot asa paagion ang sakyanan hinungdan nga di kalikayan nga ulahi na alang sa mga drayber nga makabantay nga dautan diay ang tuyo sa ilang pasahero.  - Lesley Caminade (BANAT NEWS)