Vendors sa Pelaez, Borromeo kuhaon

CEBU, Philippines - Inihap na lang ang malipayong mga adlaw sa ubay-ubay nga mga manindahay daplin sa kadalanan sa dakbayan sa Sugbu ilabi na diha sa dalan Pelaez ning siyudad gikan sa Borromeo Street ngadto na sa Magallanes Street ug uban pa.

Kini tungod kay ang nahisgutang mga manindahay hinginlan ug papahawaon na sa ilang mga pwesto sa mosunod nga mga adlaw subay sa kamanduan ni Mayor Tomas Osmeña human makaobserbar nga ang mga vendors nakatampo sa panaghuot sa mga sakyanan.

“Ang problema man gud not only are they (vendors) on the road but they attract business from the road,” nagkanayon si Osmeña.

“Ang ubang mga PUJ driver mohunong man sila para mopalit og saging, ice water, so, it’s creating disturbances in the traffic flow,” dugang pamahayag sa mayor.

Ang City Traffic Operation and Management (Citom) maoy gitahasan ni Osmeña paghawan sa kadalanan gikan sa mga vendors sulod sa 30 ka adlaw.

Una nang gibasol sa hepe sa demolition team sa siyudad, Vicente Mercado, ang usa ka consultant ni Osmeña pagdaghan sa mga vendors sa kadalanan.

Gani nagkanayon si Mercado nga ang mga sidewalk vendors mogamit sa pangalan sa maong consultant nga maoy giingong naghatag kanila og pagtugot nga makapaninda panahon nga sila demolison.

Taliwa niini niingon si Mercado nga nagpadayon gihapon ang ilang operasyon partikular na ang pagsakmit sa mga push cart. - Elly Bolonos (BANAT NEWS)