CCMC pasirad-an gihapon ni Tom

CEBU, Philippines - Nagpabilin gihapon ang tinguha ni Mayor Tomas Osmeña pagbaligya sa Cebu City Medical Center (CCMC) ngadto sa mga interesado niini bisan paman sa report nga na-improve na ang serbisyo ug pagdumala niini.

Una nang gipasigarbo ni Bise Mayor Michael Rama nga nalimpyo na ang CCMC ubos sa iyang pagdumala sa dakbayan isip acting mayor.

 Apan matod ni Osmeña nga siya nakadawat lang gihapon og mga taho nga dunay mga pasyente nga wala kahatagi og pagtagad sa mga mananambal.

“I heard that there’s some improvement, I heard that some people are complaining also that the patients are dying there at the emergency room not getting assistance,” sumala ni Osmeña.

Gitataw hinuon sa mayor nga dili niya pugngan si Rama sa pagpalambo pa gyud sa nahisgutang tambalanan apan mipadayag nga siya bukas sa bisan unsang tanyag kun dunay interesadong mopalit niini.

“I let them pursue what they are pursuing but if I get an offer, I will consider the offer,” nagkanayon si Osmeña.

Nasayran nga ang University of San Carlos (USC) maoy usa sa mga nipadayag og interes pagpalit sa city hospital kaniadto.

Gani nikuha pa ang USC sa serbisyo sa usa ka appraisal firm aron maoy motan-aw ug mobana-bana sa kantidad ug panginahanglan sa maong tambalanan.

Gusto sa mayor nga mabaligya ang City hospital tungod kay siya wala na makakita og paglaom nga moasenso ang serbisyo sa CCMC sa publiko. -  BANAT NEWS