Rodriguez wala sa order of battle

CEBU, Philippines - Wala malakip sa order of battle sa militar si Paul Rodriguez, ang lider sa Bayan Muna-Central Visayas, sumala pa sa mga kadagkuan sa Central Command.

Si Rodriguez ug uban pang lider sa mga militanteng pundok kahinumduman miduso og writ of habeas data sa korte aron papason ang iyang pangalan sa order of battle.

Si Major Christopher Tampus, ang tigpamaba sa Central Command nagkanayon wala gyud malakip si Rodriguez sa order of battle sa militar sukwahi sa gireklamo niini ngadto sa korte niadtong milabay’ng mga semana.

Sumala pa niini nga human nadawat nila niadtong milabay’ng semana ang notisya sa korte, si Major Gen. Armando Cunanan, ang commanding general sa Centcom mimando sa ilang mga personnel sa pagsuta kun unsa ka tinuod ang pasangil ni Rodriguez.

Gipasabot niini nga nunot sa maong hitabo, gitinguha gyud nilang limpyuhon ang ilang pangalan sa Central Command lakip na si Sr. Supt. Carmelo Valmoria labot sa maong pasangil tungod kay makadaot kini sa ilang imahen.

Nunot niini gihagit karon ni Tampus ang mga rebeldeng New Peoples Army (NPA) nga angkonon o pamatud-an kun ila bang kauban si Rodriguez.

Dugang pa niini nga walay letterhead, code numbers ug uban pa ang maong order of battle nga giingong gikuptan karon sa mga militante ilabi na ni Rodriguez nga magtumbok nga gikan gyud kini sa AFP.

Nagduda karon ang Central Command nga posibleng hinimo-himo ra kini sa mga NPA aron dauton ang imahe sa AFP. – BANAT NEWS