CEBU, Philippines - Usa ka tawong nakadunggab sa iyang silingan dili na mogawas sa prisohan kay nahadlok nga panimaslan sa mga kabanay sa iyang gidunggab didto sa sitio Baneka, barangay Banban, dakbayan sa Bogo niadtong Domingo sa hapon.
Ang suspetsado mao si Rengie Bagatbat, 28, minyo, nga taga Baneka, samtang ang biktima mao usab si Richard Gojo, 22, minyo nga silingan sa suspetsado.
Ang suspetsado nadakpan dayon sa kapolisan ug nagtingkagol na karon sa prisohan samtang ang biktima anaa pa sa tambalanan sa dakbayan sa Sugbo nagpaalim pa sa iyang samad dinunggaban sa hawak.
Si PO3 Allan Dosdos imbistigador sa Bogo City Police Station mibutyag sa Banat News nga nagdumili na ang suspetsado sa paggawas sa prisohan bisan kun milapas na kini sa 36 oras tungod kay wala mopasaka og kiha batok kaniya ang kabanay sa biktima.
Miingon si PO3 Dosdos nga gipapirma nila og waiver ang suspetsado sa pagmatuod nga iyang kabubut-on ang pagpabilin sulod sa prisohan.
Matud pa ni PO3 Dosdos nga gitugotan nila ang suspetsado sa pagpabilin sa sulod sa prisohan aron lamang masalbar ang kinabuhi niini. - BANAT NEWS