CEBU, Philippines - Gikumpirmar sa PNP Crime Laboratory 7 namatay sa pagkalumos si PO2 Danilo Playda sakop sa Cebu City Police Office kinsa nakit-ang wala nay kinabuhi sa port area North Reclamation Area dakbayan sa Mandaue niadtong Lunes sa buntag.
Si Regional PNP Crime Laboratory-7 regional chief Dr. Nestor Sator nga mi-autopsy sa patay’ng lawas ni PO2 Playda nagkanayon nga nalumos gyud si Playda.
“Wala tay nakitang penetrating wounds sa patay’ng lawas sa polis, sama sa mga samad dinunggaban, pusil, o kaha head injury dihang ilang giablihan ang iyang lawas,” sumala pa ni Sator.
Bugtong samad nga nakit-an mao ang nabungkag nga tinahian sa tiyan sa maong polis, ang maong tinahian agi sa pag-opera kaniya sa appendicitis nga gihimo usa ka adlaw una pa siya mapalging patay, samtang ang samad sa iyang nawong agi usab sa pinaakan sa isda.
Sumala pang Sator namatay si Playda 24 oras na ang nakalabay sa wala pa kini makit-i sa port area. Si Playda bag-uhay lang gioperahan apan giingong “miikyas” sa tambalanan.
Si Chief Insp. George Ylanan ang hepe sa Investigation and Detective Management Branch (IDMB) sa CCPO nga maoy hepe ni Playda nagkanayon walay kwestyon kun nalumos ang maong polis.
Apan ilang subayon ang mga sirkumstanya kun nganong naabot kini didto nga hilit man ang maong lugar, di suruyanan sa mga tawo ug di sad madali-dali og tultol sa tawo kun walay sakyanan.
Nahibulong usab sila tungod kay wala nay sinina, sapatos ug karsones si Playda dihang nakit-an hinungdan nga wala nila isalikway nga adunay foul play sa kamatayon niini.
Nakig-coordinate na ang CCPO-IDMB ni Insp. George Aniñon sa Homicide Section sa dakbayan sa Mandaue alang sa pagpadayon sa imbestigasyon.
Hinuon ang babayeng amiga sa maong police kinsa giingong maoy katapusang gika-estorya niini mikooperar sa kapulisan. - BANAT NEWS