Gipusil, giluba, gihagbong sa walog

CEBU, Philippines - Patay nang nakit-an sa usa ka walog ang usa ka mag-uuma nga naputos og samad dinunggaban ug pinusilan ang kalawasan sa bukirang bahin sa barangay Canbantog lungsod sa Argao niadtong Lunes sa alas 6:30 sa buntag.

Ang biktima mao si Cresente Villegas Gonzaga, 48, mag-uuma sa maong dapit, samtang ang suspek mao si Ernesto Llena, 20 nga molupyo gihapon sa nahisgutang lugar.

Matud pa ni PO1 Benjamen Gerosaza sa Argao Police dihang nahinabi sa Banat News ang biktima sa sayo pa nakit-an kining nakig-inom kauban sa suspek ug laing barkada nga si Claudio Abregana.

Gikatahong giapas sa iyang anak si Gonzaga aron papaulion apan mibalibad kini ug gipapauna og uli ang anak.

Nianang pagka-buntag gipahibawo nalang sila sa ilang silingan nga patay nang nakit-an ang biktima sa walog nga bahin daplin sa karsada.

Sa pagresponde sa kapulisan nasutang dunay daghang samad dinunggaban ang biktima sa bukton, dughan ug liog, duna sad kini samad pinusilan sa dughan nga maoy gituohang hinungdan sa kamatayon niini.

Ang kapulisan naka-recover sa crime scene og usa ka deformed slug sa .357 nga bala, apan wala pa usab matumbok ang motibo sa pagpatay ingon man padayon pa ang pagpangita sa suspek ug kainom niini. - BANAT NEWS