... Ylanan, dili makatuong nalumos lang ang polis

CEBU, Philippines – Dili makatuo ang mga imbestigador sa kapolisan sa dakbayan sa Sugbo nga nalumos patay si PO2 Danilo Playda pantalan sa dakbayan sa Mandaue.

Kini giklaro ni Chief Insp. George Ylanan ang hepe sa Investigation and Detective Management Branch (IDMB) diin ubos sa iyang buhatan si PO2 Playda ug gi-detail isip close-in police escort ni Konsehal Augustus “Jun” Pe Jr.

Matud pa ni Ylanan nga ila pa karong palawman ang imbestigasyon sa kamatayon ni PO2 Playda ug mo-cooperate sila sa lead agency nga nag-imbestigar nga mao ang kapolisan sa dakbayan sa Mandaue.

Si Ylanan nagkanayon nga gisubay karon nila ang laing anggulo tungod kay dili pa sila makatuong suicide gumikan kay usa ka “lig-on” nga pagkatawo si PO2 Playda.

Ang pagtuo nga naproblema sa kwarta ang maong polis tungod sa iyang pagka-ospital dili usab katuohan, gumikan kay ang hospital bill    sa operasyon niini mokabat lang og P13 mil nga covered na sa Philhealth.

Samtang gisubay usab nila karon ang report nga adunay “amiga nga babaye” ang maong polis ug gikatahong maoy katapusang tawo’ng gika-estorya niini sa dihang wala pa kini makit-ing patay.

Matud pa niini nga ila karong gisubay ang maong babaye kun asa na kini nga posibleng dako'g ikatabang sa pag-resolbar sa kamatayon sa polis.

Gipasabot niini nga lisod kaayong tuohan nga maghikog ang maong polis kun ugaling tuohan ang problema sa kwarta kini tungod kay mas aduna pa kini dagkong problema niining giatubang nga nasugakod sa maong polis.Sumala pa nga pipila na ka tuig ang nakalabay gipasakaan og kasong murder ang maong polis apan na downgrade kini ug naabswelto pa gyud niini.

Ang pangulo sa Police Regional Office (PRO-7) Chief Supt. Federico Terte mimando gilayon ni Cebu City Police Office director Patrocinio Comendador nga mohimo sa ilang imbestigasyon kini bisan pa man sa nanggawas nga report nga naghikog ang polis.

Gimando niini nga motutok sa laing anggulo ug dili isalikway ang ubang posibilidad.

Sa iyang bahin, nasurpresa si konsehal Augustus Pe Jr., human masayod nga napalgan na lang patay ang iyang police-bodyguard nga si PO2 Playda.

Giawhag ni Pe nga tinuon gyud sa kapolisan ang gidangatan ni Playda kun wala bay foul-play ang kamatayon niini ug palawman pa ang imbestigasyon.

“Kinahanglan gyud na nga palawman ang ilang himuong imbestigasyon kun nganong naingon man na ana,” sumala ni Pe. Nagdumili hinoon ang konsehal paghatag og dugang kasayuran apan kini midugang nga ang nahisgutang polis nahimo niyang bodyguard sulod na sa usa ka tuig.

Si PO2 Playda, 37, ug molupyo sa Tangke, dakbayan sa Talisay, nadistino sa Investigation Detective Management Branch sa Cebu City Police Office. –BANAT NEWS