Polis napalgang patay sa dagat

CEBU, Philippines – Usa ka polis nga sakop sa Investigation Detection and Management Bureau (IDMB) sa Cebu City Police Office (CCPO) ug nadestino isip close-in police escort ni Konsehal Augustus "Jun" Pe Jr. napalgan sa ilawom sa dagat sa port area sa F.F. Cruz sa Reclamation area sa dakbayan sa Mandaue alas 9 pasado ang takna niadtong Lunes sa buntag.

Ang polis mao si PO1 Danilo Playda, 37, minyo nga taga Buanoy, lungsod sa Balamban ug kasamtangang nagpuyo sa barangay Tangke dakbayan sa Talisay.

Si PO1 Cristito Raboy sa Homicide Section sa Mandaue City Police Office (MCPO) nga nahinabi sa Banat News miingon nga napalgan ang patay'ng lawas ni PO1 Playda nga mitundag sa ilawom sa dagat sa port area human sa pagsawom alang unta sa pagpamana.

Matud pa niya nga sa dihang ilang giugkat ang maong patay'ng lawas uban sa mga sakop sa Philippine Maritime Police ilang nakuha ang cellphone nga gitangkil niini.

Gitangtang nila ang SIM pack sa nakuha nilang cellphone sa biktima ug ilang nakontak ang pamilya sa ilang pinuy-anan sa dakbayan sa Talisay kinsa maoy nag-ila niini.

Dugang pa niya nga ang biktima bag-o pa nga gioperahan sa iyang appendicitis sa usa ka pribadong tambalanan sa dakbayan sa Sugbo ug gikatahong milakaw kini nga wala magpahibalo niadtong Marso 1 niining tuiga.

Si PO1 Raboy miingon nga giangkon sa pamilya sa biktima nga wala na nila makontak ang biktima sukad sa paglakaw ug wala na usab masayod hain kini mopaingon.

Nahingangha na lamang ang pamilya sa dihang nahibalo nga patay na kining napalgan sa ilawom sa pantalan sa port area sa FF Cruz sa reclamation area.

Si PO1 Raboy miingon sa pasiuna nilang pakisusi nga wala sila makakita og mga timailhan nga gituyo sa pagpatay ang biktima gawas lamang sa tinahian sa tiyan nga agi sa pag-opera sa appendicitis niini.

Hinuon ilang ipaubos sa autopsy ang patay'ng lawas ni PO1 Playda alang sa pagsuta kun may foul play ba o wala ang kamatayon niini. –BANAT NEWS