Lagundi Reef ablihan sa Abril

CEBU, Philippines - Ang giplanong subli nga pagbukas sa Lagundi Reef, ang sangtuwaryo sa mga isda sa dakbayan sa Talisay dili mahinayon karong Marso 26, 2009.

Si Konsehal Shirley Belleza, tsirman sa Tourism Heritage Council sa siyudad nagkanayon nga ilang giuswag ngadto sa ikatulong semana sa Abril niining tuiga ang pag-abli sa maong sangtuwaryo.

Midugang si Belleza nga sa pagkakaron padayon pa ang paghinlo sa nakuyat-ag ug nangagupok nga mga gasang ug mga bato sa ilawom sa dagat nga anaa sa maong “takot” human kini daruha sa barko nga M/V United Majuro nga misangad sa maong dapit niadtong Marso 5, 2009.

Matud ni Belleza nga daghan pang mga pintal sa barko ang nahibilin sa ilawom sa dagat nga kinahanglang kuhaon tungod kay makahilo kini sa mga isda nga nagpuyo diha sa mga gasang.

Niadtong Biyernes si Belleza mikuyog sa mga mananawom nga mi-dive sa Lagundi ug mitabang siya sa pagkuha sa mga pintal nga nahibilin sa ilawom sa maong takot.

Ang mga diver niadtong higayona nakahipos og usa ka sakong tipaka sa mga pintal sa barko nga nahibilin diha sa Lagundi.

May mga gasang nga naigo sa pintal ug gumikan sa kaisog sa baho sa pintura, milagom dayon ang maong mga gasang.

Gipundok karon sa ilawom sa dagat ang mga nabuak nga mga gasang nga gihiktan og mga nylon, dayon giporma kining pyramid.

Si Belleza midugang nga kun ablihan na pag-usab ang Lagundi Reef dili na pasuroyan sa mga diver ang lugar nga gidaro sa barko aron maulian dayon ang mga nangabuak nga bato ug mga gasang sa maong lugar. (Brenda D. Batuto)    (BANAT NEWS)