Estatwa sa Talisay landing gisaway

CEBU, Philippines - Mga estatuwa sa mga Amerikanong sundalo nga gibutang diha sa landing marker sa barangay Poblacion alang unta 64th Landing Anniversary sa dakbayan sa Talisay gilarot tungod kay daghan ang misaway niini.

Si Konsehal Shirley Belleza kinsa tsirman sa Tourism Heritage Council sa dakbayan sa pakighinabi niini sa Banat News kagahapon imbes dayegon gisaway na hinuon sa kadaghanan sa nakakita dihang kini gitarok kini niadtong Huwebes.

Ang pagsaway naglangkob ang kakuwang sa ubang mga estatwa og kilay, kurba ug tuhoy ang mga bukton ug ang expression sa mga nawong dili susama sa dagway sa sundalong mopaingon sa gubat ug tinong kamatayon.

Samtang gawas sa panagway, gihulagway usab ang maong mga estatwang sundalo nga daw di mangadto og gubat tungod kay sa ilang mga barog daw kini padulong lang manuroy, wala say combat backpacks, walay radioman ug uban pa nga mao gyuy sagad makita sa mga sundalong mangadto sa panggubatan.

Gipasabot ni Belleza nga kinahanglan nga makita sa pamayhon ug sa facial expression sa maong estatuwa nga ang mga aksiyon niini ang nag-takas o mi-landing.

Ang pito ka estatuwang ginama sa fiber glass nagkantidad og P1 milyon, ang renovation sa landing marker budget nagbalor og P6 milyones.

Tungod sa mga pagsaway sa mga nanguryoso niini gipanglarot kini niadtong Sabado apan gitinguhang mabalik kini sa dili pa ang selebrasyon karong Huwebes.

Ang landing marker pormal nga tangtangan og telon ni Kongresista Eduardo Gullas isip pinasidunggang dinapit sa umaabot nga kalihukan, lakip sa motambong mao ang seretary sa National Defense nga si Gilberto Teodoro. (Brenda Batuto)    (BANAT NEWS)