Nakaanak human maaksidente

CEBU, Philippines - Pito ka mga tawo ang nangaangol apil na ang tulo ka mga minor de edad ug usa ka mabdos ang naahat og panganak dihang nalimbuwad ang gisakyang van nga gihimong ‘school bus’ diha sa highway sa barangay Calongcalong siyudad sa Toledo niadtong Domingo sa alas 10:45 sa buntag.

Ang mga nangaangol mao ang drayber nga si Nelson Bascar, 42, taga barangay Arpili lungsod sa Balamban ug mga pasahero niining sila si Dorothy Lumantad, 9, mabdos og walo ka buwan; Ryan Christian Buhia, 9; Vince Lemuel Lumantad, 11; Haidy Pacres, mabdos ug manganakay unta karong unang semana sa Abril pulos molupyo sa Arpili Balamban.

Samtang duna pay laing duha ka batang sila si Franz Steven Talam,8 ug El Nick Randel Talam, 10, nga kauban sa maong van ang nangaangol usab.

Apan nasayran nga giingong puno ang maong van og mga tinun-an ug mga katabang niadtong tungora apan ang pito ra maoy nangalandig sa tambalanan.

Matud ni PO3 Julius Sanchez traffic investigator sa Toledo City police dihang nahinabi sa Banat News ang maong van gikan sa siyudad sa Toledo ug paingon na unta silang mopauli sa lungsod sa Balamban.

Apan paghiabot sa nahisgutang lugar nakasinati og problema ang maong sakyanan ug nawad-an og preno dayon mitipas sa walang bahin sa karsada una pa mabalitok.

Nagduda ang mga kabanay sa mga nanakay nga hubog ang drayber maong nawad-an kini og control tungod kay misampak kini sa punoan sa kahoy.

Sumala pa sa kapolisan ang ilawom nga bahin sa sakyanan mao nay tua sa ibabaw hinungdan nga nangalamba ang mga sakay diha sa sulod diha sa maong sakyanan.

Sumala pa ni Copernicus Logroño amahan sa agalon ni Pacres nga gihinabi sa Banat News nagkanayon nga nabun-og ang tiyan niini ug girekomendar dayong ipailawom sa caesarean section sa Vicente Sotto Memorial Medical Center.

Si Pacres nakaanak og himsog nga batang babaye apan giingong kinahanglang magpaalim pa kini diha sa maong tambalanan gumikan sa nahiagumang trauma bunga sa aksidente.   (BANAT NEWS)