Pasahero gibato kritikal

CEBU, Philippines - Kritikal ang kahimtang sa usa ka 57-anyos nga pasahero sa bus pasahero-an human kini batoa sa duha ka mga lalaki nga nagsakay og motorsiklo didto sa barangay Liong, lungsod sa Dumanjug niadtong Biyernes sa gabii.

Ang biktima mao si Pronteras Melquiades, 57, minyo nga taga barangay Tumonoy, lungsod sa Moalboal.

Si Eduardo Guitia Maravillas nga taga Lawaan, Dumanjug maoy drayber sa Librando bus nga maoy gisakyan sa biktima.

Si PO3 Samuel Sarmiento sa Dumanjug Police Station mibutyag sa Banat News nga gikan sa dakbayan sa Sugbo paingon sa habagatan ang Librando bus ug pag-abot niini sa maong lugar gikasugat niini ang motorsiklo nga gisakyan sa duha ka tawong wala hiilhi unya sa walay igong hinungdan kalit lang gilabay og bato sa backrider niini ang drayber sa bus.

Apan nakabantay ang drayber ug nakahupo hinungdan nga milahos ang bato ug ang biktima kinsa nahinanok pag-ayo sa pagkatulog sa luyong lingkoranan sa drayber, maoy naigo sa ulo.

Giatiman dayon sa drayber ang biktima kansang dugo sa ulo nag-agas samtang nagsuka usab kini og dugo unya nakuyapan sa paghiabot didto sa Barili District Hospital hinungdan nga gilahos kini sa tambalanan dinhi sa dakbayan sa Sugbo. - BANAT NEWS