USA di na 'greener pasture' - Remonde

CEBU, Philippines - Karong panahona dili na “greener pasture” ang nagpaabot sa Estados Unidos alang niadtong mga Pilipino nga nagsalig sa maayong kaugmaon sa panginabuhi didto sa gawas gumikan kay unang nasugamak sa global crisis ang maong nasud, sumala pa sa pasidaan ni Press Secretary Cerge Remonde.

Si Remonde kinsa maoy pinasidunggang mamumulong atol sa ika-63 nga Commencement Exercises sa Cebu State College of Science and Technology (CSCST) Argao Campus niadtong Sabado sa hapon nagkanayon nga dili na angayan pang lantawon sa mga graduwado karon nga adto manarbaho sa America.

Kini tungod kay ang United States of America (USA) maoy nahiagom pag-ayo sa kahapdos ug epekto niining krisis sa ekonomiya nga milatigo sa tibuok kalibotan.

Iyang gihisgotan ang makapakurat nga mga balita nga kun may 60,000 ka mga trabahante ang nawad-an og trabaho karon dinhi sa nasud, didto sa USA mikabat na sa 5 ka milyon ang wala nay panginabuhi karon pa lang panahona.

Busa ang pagdamgo sa usa ka tawo nga adto makakaplag og maayong panginabuhi o greener pasture sa gawas sa nasud, wala nay katumanan sa pagkakaron tungod sa hilabihan kalisod na sa panginabuhi didtong dapita, matud pa sa Press Secretary.

Matud pa ni Remonde nga baniog na kaayo ang mga balita karon diin daghan nang mga Amerikano kinsa napapha sa ilang trabaho nga gumikan sa ka-aburido sa hunahuna, misangpot sa paghuramentado ug miunay na pagpatay sa kaugalingong asawa ug mga anak.

Kini epekto sa krisis nga miigo sa maong nasud karon nga nakapalusno sa paglaum sa mga molupyo didto kansang panginabuhi gisandig lamang sa panarbaho. - BANAT NEWS