CEBU, Philippines - Ang Police Regional Office director mimando sa tanang Provincial ug City directors nga tibuok Kabisay-an nga estriktong ipatuman ang pagsul-ob og helmet sa tanang miyembro sa Philippine National Police(PNP) tungod sa kamatayon sa usa ka Field Training Police (FTP) nga polis sa miaging adlaw.
Si PRO-7 Director Chief Supt. Federico Terte nagkanayon sa memorandum kagahapong adlawa nga pasul-ubon gyud og crash helmets ang mga polis nga magmotor.
Si PO1 Brett del Socorro Selma, nadestino sa beat patrol sa Talisay Police Station namatay human gidaro sa 10-wheeler truck diha sa South Reclamation Road(SRP) sa habig sa Talisay.
Base sa report si Selma nagsuot og crash helmet dihang kini gidaro sa usa ka van ug napasok ilawom sa trak una pa mabagnos og unom ka metros samtang nag-aginod ang trak.
Usa ka polis nga gihinabi sa Banat News mipadayag sa iyang opinyon apan dili gustong pagpahingalan nagkanayon nga ang pagsul-ob og helmet kun mosakay og motorsiklo automatiko na tungod kay mao man ang balaod.
Sumala pa sa mga eksperto sa road safety, ang hustong helmet dako og matabang sa mga motorista kun kini malagpot o mapantok ang ulo diha sa dalan mugna sa pagkaaksidente.
Dugang pa sa polis nga “Implementor gani ka, dili gyud ka Violator” pasabot pa sa maong pulis. - BANAT NEWS