'Tata Negro' ug higala naluoy ni Rama sa isyu

CEBU, Philippines - Giklaro sa tawong mitawag kang Bise Mayor Michael Rama nga siya maoy nanawag niini pinaagi sa iyang cellphone ug igo ra niyang gipasa ngadto sa opisyal sa kapolisang mironda diha sa ilang lugar niadtong Nobiyembre sa milabayng tuig diha sa sitio Kawayan sa barangay Sambag II.

Si Mark Tallo, residente sa maong dapit ug nangangkong suod nga higala ni Rama sukad pa sa kolehiyo pa sila nagkanayon nga wala mointerbiner ang bise mayor tungod kay igo ra siyang nagpakitabang.

Matud pa niya ang pamilya ni “Tata Negro” kansang tinuod pangalan mao si Crisostomo Llaguno nagpakitabang kaniya tungod kay kalit nga nanulod ang mga polis sa ilang balay ug gikuha ang usa ka sakong sensilyo nga gibana-banang P100, 000 kapin.

Sumala pa ni Tallo, ang maong mga sensilyo di gikan sa video karera kundili sa negosyo ni Llaguno nga video games sa internet nga hulog-hulogan og piso nga gipakatap na karon sa siyudad ug nagkadaiyang lugar.

Si Llaguno dihang gihinabi sa Banat News diha sa iyang balay miangkong nalambigit siya kaniadto sa illegal nga drugas ug nabilanggo gyud siya niini, apan human siya makagawas nag-usab na siya ug misuway og pagnegosyo sa legal nga pamaagi.

Gani, nakatabang pa siya karon sa mga kanhi bilanggo pinaagi sa pagpatrabaho kanila pagpanday sa mga kaha video game machines, sa pagkakaron duna siya’y 200 ka units niini.

Gihimakak ni Llaguno nga nag-operate siya og videokarera tungod kay nasayod siyang illegal kini ug dakpunon, apan nasagmuyo siyang bisan sa paningkamot nga mag-usab padayon gihapon ang di maayong pagtan-aw kaniya.

Giklaro ni Llaguno ang video karera machines nga nakuha sa kapolisan dili sa iyang balay kundili sa ilang silingan nga pipila ka metros ang gilay-on apan ang usa ka sakong sensilyong gikuha sa mga polis gikan sa iyahang balay.

Ang kapolisan nangangkong may namusil sa mga polis ug ilaha kining gigukod diha sa balay ni Llaguno, apan si Llaguno mihimakak niining tanan ug nagkanayon nga walay tawong nakasulod ug walay tawong nakagawas sa ilang balay gawas lang sa mga polis.

Matud pa ni Tallo unang gisulod sa mga polis ang balay sa inahan ni Llaguno diin masigpati ang giingong namusil sa mga polis apan bata ray ilang naabtan hinungdan nga mibalik sila sa agi ug gisulod ang balay sa naulahi ug gikuha ang usa ka sakong sensilyo.

 Kini maoy hinungdan nga nagpatabang siya kang Tallo kinsa higala ni Rama aron maklaro kun nahasubay pa ba sa balaod ang gihimo sa grupo ni Supt. Jonathan Abella.

Si Tallo mipadayag nga naluoy siya karon sa higalang si Rama nga limpyo kaayo ang konsensyang mitabang kanila apan mao na karon hinuoy migawas nga dautan ug nauwawan sa publiko tungod sa pasangil sa kapolisan. Samtang si Tallo mibutyag nga nahibulong usab sila nga gibiyaan sa mga polis ang maong usa ka sakong sensilyo atol sa ilang pagbiya diha sa gawas ug ang ilaha ng mga silingan maoy niuli niini kang Llaguno.

Si Rama daan ng mihimakak nga miinterbiner kini sa maong police operation ug mipadayag nga igo ra siyang nanigurong di nasad masayop ang kapolisan sa ilang mga gipanghimo ug ingon man aron usab malikay sa peligro ang mga residente tungod dakong posibilidad nga may mahitabong pagpamusil sa luagr. - Lesley Caminade (BANAT NEWS)