CEBU, Philippines - Malampusong gipahigayon kagahapong adlawa ang coastal ug barangay clean-up sa dakbayan sa Sugbu nga gipasiugdahan sa Coastline Management Board (CMB) sa siyudad ug gisalmutan sa mga molupyo sa nagkadaiyang barangay.
Lakip sa mitabang paglimpyo sa 16 ka coastal ug kapin sa 30 ka urban barangay mao ang mga tinun-an sa nagkadaiyang tunghaan ug ubang mga non-governmental organization nga himuon matag tulo ka bulan.
Sama sa gipaabot, gatusan ka toneladang basura ang nahipos sa mga volunteers gikan sa kabaybayunan ug sa nagkadaiyang mga barangay.
Matud pa ni bise mayor Michael Rama, ang coastal ug barangay clean- up dako ang matabang sa kalikupan tungod sa nagpasad nga mga basura sa siyudad.
“At least every quarter makapahigayon ta og clean-up but I hope nga ang pagpanglimpyo regular nga himuon sa kabarangayan dili lang matag tulo ka buwan,” sumala ni Rama.
Ang bise mayor nga maoy nag-monitor sa nahisgutang kalihukan miingon nga subli nilang napamatud-an nga nagpabilin pang buhi ang barangayan, bayanihan ug bolunterismo.
Kini tungod kay giingong nagpabilin ang kadasig sa mga volunteera pagtabang og limpyo sa mga dapit nga daghan og mga basura.
Dili lang sa kabaybayunan lakip na kasapaan ug ubang mga dapit sa nagkadaiyang urban barangay nga nisalmot sa barangay ug coastal clean up.
Ang kagamhanan sa dakbayan migahin og kantidad alang sa mga sako sa bugas nga gamiton sa mga volunteer sa kabarangayan.
Kini maoy labing unang higayon nga nihatag og pahalipay ang city government ngadto sa mga volunteers sa maong kalihukan. - Elly Bolonos (BANAT NEWS)