Transport sector giawhag pag-e-jeepney

CEBU, Philippines - Gitambagan sa mga sakop sa hunta probinsiyal ang mga grupo sa mga drivers dinhi sa Sugbu nga suwayan og susi ang nabantog na karong electric jeepneys kon e-jeepney nga gimugna sa Environmental Group Green Renewable Independent Power Producer kon GRIPP.

Kini aron makakuha og alternatibong pasaheroan panahon nga mosaka ang mga presyo sa petrolyo.

 Sumala pa ni Provincial Board Member Juan Bolo nga ang GRIPP may 14-seater electric-powered, four speed jeepney, dili banha ang makina ug labaw sa tanan walay polusyon tungod kay wala kini carbon emission – butang nga makaayo sa kalikupan ug mga pasahero.

 Si Bolo nagkanayon nga dinhi sa nasud, ang Philippine Utility Vehicle Inc. kon PhUV maoy mo-assemble sa manual transmission sa 14-seater electric jeepney ngadto sa mga mopalit niining talagsaong sakyanan.

 Duna kini duha ka klaseng makinang gigamit, kini mao ang five- kilowatt ug 7.5 kilowatt nga model electric jeepneys nga karon gipanggamit na sa kadalanan sa Baguio ug Tagaytay.

 Gitataw usab ni Bolo nga makadaginot pa ang mga operators ug driver sa paggamit sa 14-seater e-jeepney tungod kay mapalit man kini sa balor nga P625 mil pesos, mas barato kun itandi sa second-hand 22-seater diesel-powered passenger jeepneys o brand new unit nga mapalit sa usa ka milyon ka pesos.

 Ang e-jeepney magkinahanglan lang og 12 six-volts batteries nga mapalit sa P6,500 pesos matag usa, ma-recharge sulod sa walo ka oras gamit ang 220 volt outlet ug molungtad kini og dagan gikan sa duha ngadto sa tulo ka tuig una pa mailisan.

 Tungod niini, giawhag sa provincial board ang mga PUJ drivers ug operators nga mogamit niining electric power jeepney aron makatabang usab kini sa pagmenus sa problema sa polusyon. - Chester Abadilla (BANAT NEWS)