Drug suspek gikombikto og 'life'
CEBU, Philippines - Gikombikto sa korte ang usa ka drug dealer dinhi sa Sugbu nga nakuhaan og .05 gramos sa shabu atol sa nahitabong buy bust operation sa kapolisan niadtong Nobiyembre 13, 2007.
Si RTC-7 Branch 8 Judge Macaundas Hadjirasul mikombikto sa usa ka Siegfred Cadungog Barrios sa kasong Violation of Section 5, Article II sa Republic Act 9165 kon Comprehensive Dangerous Drugs Act.
Si Judge Hadjirasul wala makumbinsir sa mga alibi ni Barrios nga gi-frame up lang kini sa kapolisan ug wala sad hatagi og gibug-aton pagkwestiyon sa abogado sa depensa sa kabalido sa pagkasikop sa iyang kliyente.
Ang depensa mikwestiyon tungod kay walay saktong inventory ug photograph sa mga ebidensiya ug wala say presensiya sa miyembro sa DOJ atol sa operasyon.
Apan matud pa sa korte wala makompromiso ang integridad sa paghipus sa mga ebidensiya.
Si Judge Hadjirasul nisilot kang Barrios sa pagkabilanggo sa tibuok kinabuhi ug pagbayad og tunga sa milyon nga multa.
Samtang gimanduan sa naasoy’ng huwes ang kapolisan sa pag-despose sa shabu sa tukmang pamaagi. - Chester Abadilla (BANAT NEWS)
- Latest
- Trending
