Rama miinterbiner sa police operation

CEBU, Philippines - Lain na usab nga pasangil ang gibutyag ni Cebu City Mayor Tomas Osmeña batok sa iyang bise mayor nga si Michael Rama.

Ang mayor mibutyag atol sa ABC general assembly nga si Rama nidupa sa usa ka police operation diha sa barangay Sambag 2 niadtong miaging tuig.

Ang gipasabot ni Osmeña mao ang gihimong pagpangronda sa kapulisan sa mga video karera diha sa maong dapit niadtong miaging Nobiyembre.

Atol sa maong operasyon gipusil sa wala mailhing suspetsado ang sakyanan sa kapulisan hinungdan nga gipangita sa mga polis ang responsable.

Apan dihang nisugod na pagpangita ang kapulisan sa suspetsado kalit lang giduol si Supt. Jonathan Abella sa usa ka tawo ug mitunol sa iyang cellphone ngadto sa opisyal.

Kini gikumpirmar mismo ni Abella ug sa iyang pagtubag, si Rama nga maoy acting mayor sa siyudad niadtong higayuna giingong mipahunong sa ilang gihimo.

Gani niingon si Abella sa pagpakighinabi sa DYHP-RMN Cebu nga sila gipangitaan pa sa acting mayor og search warrant sa ilang gihimo.

Ang pamahayag ni major Abella gisuportahan usab ni Sambag 2 barangay captain Carl Belarmino nga diha atol sa police operation.

Matud pa ni Osmeña nga iyang nasabot nga niinterbinir si Rama sa operasyon sa kapulisan nga giingong dili unta angayang buhaton niini.

“Very clearly, how would you feel being shut up and the vice mayor scolds you, it’s very demoralizing on the part of the police,” sumala ni Osmeña.

Mipasidan-an si Osmeña sa bise mayor nga dili manghilabot sa bisan unsang operasyon sa kapulisan sa siyudad.

“I’ll follow the law na lang but I give warning to the vice mayor that do not interfere with the police operations,” sumala ni Osmeña.

Sa iyang bahin giangkon ni Rama nga siya nanawag kang Abella apan iyang giklarong wala siya mointerbiner sa police operation.

Ang iyaha lang mao ang pagpanalipod sa kapulisan nga mag-atubang unya og problema tungod kay kini walay dala nga search warrant.

Gipasabot ni Rama nga dili angayang lakturon ang pagpatuman sa balaud tungod kay giingong dunay proseso nga sundon niini.

“Klaro man gyud nang akong pilosopiya that I am a public servant that observe the rule of law, mao bitaw nang gitawag og rule of law not the rule of men,” matud pa ni Rama.

Unang nidepensa sa gibuhat sa bise mayor mao ang iyang ig-agaw nga si Basak San Nicolas barangay captain George Rama ug nagkanayon nga husto ang gihimo sa iyang ig-agaw tungod kay kini usa usab ka abogado ug dunay kahibawo labot sa balaud.

Nagtuo si kapitan Rama nga nahatagan lang og sayop nga kasayuran ang mayor sa mga kaalyado niini nga gusto usab nga modaut sa iyang ig-agaw. – BANAT NEWS