Vendor sa Talisay bugawon

CEBU, Philippines - Ang mga sidewalk vendor sa dakbayan sa Talisay gipasanginlang usa sa mga naghatag og problema bahin sa basura tungod kay magpatuyang lang og labay sa ilang basura.

Si Edwin Nierves, operation in charge sa Ecological Solid Waste Management (ESWM) sa pakighinabi niini sa Banat News kagahapon mibutyag nga mismo siya nakakita nga kasagaran sa mga sidewalk vendors anha lang ihagbong sa kanal ang ilang mga basura nga maoy hinungdan nga dali rang mobara ang mga imbornal diha sa maong dakbayan.

Busa giawhag ni Nierves ang mga vendor nga magtinarong sa paglabay sa ilang basura ug dili magdinamak ug gisugyot niya ang paghimo og kaugalingon nilang compost sa likoran sa ilang panimalay aron nga gawas nga limpyo, may abuno pa sila. - Brenda D. Batuto (BANAT NEWS)