Bitiis sa estudyante nabali kay naligsan

CEBU, Philippines - Nabali ang bitiis ug nasamad ang ulo sa usa ka 12 anyos nga bayong-bayong human kini maligsi sa usa ka trak de karga sa iyang pagkanaug sa gisakyan niini paingon sa eskuwelahan didto sa Sitio Bahad, Poblacion lungsod sa San Remegio, Cebu niadtong Huwebes sa buntag.

Ang maong batan-on mao si Devin Paul Casia, 12, ug estudyante sa 1st year high school sa San Remegio National High School nga taga Bahad.

Samtang ang drayber sa Isuzu Cargo trak nga nakaligis kaniya mao si Jose Epe, hingkod, minyo, nga taga Curva, Medillen, Cebu.

Gibutyag ni PO2 Randy Sibay sa San Remegio Police Station sa Banat News nga ang maong batan-on misakay og sakyanan paingon sa eskuylahan ug didto kini manaog sa atubangan sa sports complex sa lungsod.

Apan sa iyang pagkanaog mikalit lang siya og labang sa karsada nga walay lingi-lingi busa wala makabantay sa naghagoros nga de karga nga kargado sa tubo.

Gumikan sa kakusog nga dagan sa maong de karga, wala na makontrol ang preno niini busa nalatayan gyud sa ligid sa sakyanan ang walang bitiis ug nabunal pa ang iyang ulo sa sementadong karsada.

Hinuon gisakwat dayon sa drayber sa maong de karga ang biktima ug gihatod ngadto sa Verallo District Hospital sa siyudad sa Bogo apan gumikan sa katalandugon sa iyang kahimtang gibalhin kini sa pribadong tambalanan sa dakbayan sa Sugbo.

Nabalhog na sa prisohan ang drayber ug nagpaabot nalang sa kiha batok kaniya. - BANAT NEWS