Negosyante gipusil patay

CEBU, Philippines - Patay dihadiha ang usa ka negosyante human gipaulanan og mga bala sa duha ka mamumunong nagmotorsiklo kagahapon sa alas 2:30 sa hapon diha sa dalan Calomarde, barangay Camputhaw ning dakbayan sa Sugbo.

Ang namatay giila sa kapolisan nga si Anna Yu, 68, biyuda, nagpuyo sa nahisgutang lugar. Nakaangkon kini og samad pinusilan sa iyang ibabaw’ng bahin sa walang mata nga milapos sa luyong bahin sa ulo human gikalitan sa pagpusil samtang nag-abli sa ilang gate sa panimalay.

Si Chief Insp. George Ylanan, hepe sa Investigation and Detective Management Branch (IDMB) nagkanayon nga duha ka mga suspetsadong nagsakay sa motorsiklo namusil ngadto sa biktima sa wala pa matinong armas.

Matud pa ni Ylanan nga sa inisyal nga pakisusi, ang katabang sa biktima mitug-an kanila nga si Yu mao pay nangabli sa gate sa dihang gipatingog sa mga mamumuno ang doorbell sa balay. Si Yu nakig-estorya pa sa mga mamumuno.

Gikatahong nangutana ang mga suspek kun aduna bay building nga paabangan sa dihang gikalitan lang sa pagpusil sa usa sa suspetsadong nag-angkas sa motorsiko hunungdan nga maayong pagka-igo sa iyang ulo ug namatay apan gidala lang gihapon sa tambalanan.

Si SPO4 Alex Dacua, imbestigador sa Homicide Section sa Cebu City Police Office nga nahinabi sa Banat News nagkanayon nga ang gunman taason, tambokon ug pution nga nagsul-ob og stripe nga sapot, samtang ang drayber niini nag-helmet ug nakita sa mga saksi nga bungoton ang suwang.

Matud pa ni Dacua nga ang katabang sa biktima kinsa didto sa 2nd floor mitimbaya sa mga mamumuno nga ipasige lang og patingog ang doorbell tungod kay ang ila rang amo maoy moabli sa pultahan.

Apan sa dihang naabli ang gate, gidul-itan kini sa pagpusil tumong sa ibabaw nga bahin sa mata nga milapos sa luyong bahin sa ulo. Ang mga mamumuno daling misibat paingon sa Archbishop Reyes Avenue.

Ang kapolisan nakakuha og usa ka kabhang sa kalibre .45 ug usa ka slug sa bala sa lugar nahitaboan.

Nasayran, si Yu nahimong kontrobersiyal sa miaging tuig sa dihang gi-rescue sa kapolisan ang tulo ka katabang niining taga Mindanao nga matud pa wala na pagawasa sa ilang panimalay. – BANAT NEWS