CEBU, Philippines - Nabantog karon ang Pilipinas nga maoy bugtong nasud sa tibuok kalibotan nga nagprodukto og labing de kalidad nga biofuel kansang kompaniya nga nagpabrika niini nga mao ang Univalm Eco – Dynamics Energy Industries(UEDEI) makadawat og award gikan sa usa ka inilang organisasyon nga nagbase sa Geneva, Switzerland nga mao ang Century International Quality ERA Award (CIQEA) .
Si Vic A.L. Medel ang usa ka nainilang scientist nga Sugbuanon kinsa maoy tagdumala ug tag-iya sa UEDEI mikonpirmar niini sa Banat News kagahapon kinsa nagkanayon nga madawat niya ang Gold Category for Renewable Vegetable Based Energy award.
Matud pa ni Medel nga adto niya dawaton ang maong award sa Geneva, Switzerland atol sa 11th International Convention sa Geneva karong umaabot nga Abril 26 ug 27, 2009.
Ang maong award sa CIQEA ihatag lamang niadtong mga kompaniya kansang produkto nasuta nga labing maayo og kalidad sa nagkalainlaing natad nga may labot sa enerhiya.
Anaa na sa iyang ika-23 ka tuig nga pangalagad sa tibuok kalibotan sa pagpresentar og award ngadto sa mga nasud sa kansang produkto namatud-an nga dako kaayo og ikatabang sa pagdaginot sa enerhiya.
Matud pa ni Medel nga dihang iyang gipahibawo si Presidente Gloria Macapagal Arroyo bahin sa award nga madawat sa iyang kompaniya, naglumpayat sa kalipay ang Pamuno nasud tungod kay dili lamang dungog ni Medel ang mabaniog sa tibuok kalibotan kundili dungog kini sa katibuk-ang pangagamhanan sa nasud nga gipangunahan ni Presidente Arroyo.
Ang UEDEI tua na karon magbase sa Africa apan ang gamot ug kagikan niini dinhi manukad sa dakbayan sa Sugbo, nga natukod sayo niadtong 1990, matud pa ni Medel. - Wen Celen (BANAT NEWS)