Burlas taktakon na pagkapolis

CEBU, Philippines - Naupos na ang pailob sa kadagkoan sa kapolisan sa Sugbo batok ni PO3 Joseph Glenn Burlas hinungdan nga hingpit na kining putlan sa serbisyo kun mosipyat pa kini pag-usab matud pa sa hepe sa kapulisan sa lalawigan sa Sugbu Sr. Supt. Carmelo Valmoria.

Si Burlas direyot makapag og pinusilay tali sa gwardiya sa Talisay City Hall   niadtong Martes sa buntag gumikan sa giingong Valmoria nga pagka-abusador niining tawhana.

Matud pa ni Valmoria nga bisan pa kun nagkasabot na sila si PO3 Burlas ug ang guwardiya’ng si Gabriel Mayorita sa Lancer Security Agency magpadayon gihapon ang administrative investigation batok kang Burlas.

Kini tungod kay di lang kini maoy unang higayon nga nag-atubang sa kasong administratiba ang maong polis ug gani nagpadayon pa hangtud ning mga higayona ang iyang ubang kaso nga maoy hinungdang gilabay kini niya sa lungsud sa Tuburan, matud pa ni Valmoria.

Giklaro usab sa hepe sa Cebu Provincial Police Office (CPPO) nga anaa na kaniya ang apidabit ni Mayorita kalabot sa gibuhat ni Burlas ngadto kaniya.

Nasayran nga niadtong Martes puwerting lisanga sa mga tawo didto sa Talisay City Hall dihang mihiwasa sa kasuko si Burlas kay gisita kini ni Mayorita  kay nganong didto kini moagi sa entrance nga pultahan gikan nga mitambong og kaso sa buhatan sa piskaliya sulod sa city hall.

Sa kapungot ni Burlas, gibaharan niini ang security guard nga pusilon ug gani iya dayong gikuha ang iyang armas didto sa sakyanan ug sa pagbalik niini dala na ang iyang armas kay pusilon ang guwardiya.

Maayo nalang kay wala mogawas si Mayorita apan nagpasalipod lang sa pultahan sa city hall kay inigsulod ni Burlas pasuwerte lang kun kinsay una og pabuto sa ilang armas.

Sa maong hitabo puwerting pungota ni Valmoria kay alang kaniya husto man og kabuot si Burlas ug edukado man kini kay polis man, mao unta kini unang mitahod sa balaod ug dili kay magpakita sa pagka-abusador.

Busa miingon si Valmoria nga katapusan na kining atraso ni Burlas sa iyang pagkapolis ug sa sunod huboan na kini sa iyang uniporme sa pagkapolis , matud pa ni Valmoria.  - Guam Logrono (BANAT NEWS)