CEBU, Philippines - Gisugyot sa Cebu City Anti-Indecency Board (CAIB) nga magtukod og monumento sa Acquired Immune Deficiency Syndrome (AIDS) dinhi sa dakbayan anha nianang Junquera sa barangay Kamagayan.
Kini aron sa pagpakita usab nga ang siyudad seryoso nga misuporta sa kampanya batok sa nahisgutang makamatay nga sakit.
Matud sa chairman sa CAIB, Doctor Rene Josef Bullecer, nga ang ilang gisugyot nga dapit nga tukoran sa AIDS (red ribbon) monument mao ang barangay Kamagayan particular na kanang nahimutangan karon sa Citi-Center Commercial Complex .
Sa sayo pa giplanohan na sa kagamhanan sa dakbayan ang pag-demolish sa building sa Citi-center aron himoon ang lugar nga sunken plaza.
Gipadayag ni Bullecer nga makahuloganon ang pagbutang sa monumento sa AIDS diha sa maong barangay tungod kay kini gitawag og red light district sa dakbayan.
Gitataw sa chairman sa CAIB nga ang siyudad mao na lay nahabilin sa malamboong mga dakbayan sa nasud nga walay monumento sa AIDS.
Gusto ni Bullecer nga ipakita usab sa City government ang pagka-seryoso niini sa kampanya batok sa nahisgutang sakit tungod kay maoy gusto sa World Health Organization (WHO) nga matag dakbayan aduna gyu’y timaan nga nakigbatok kini sa AIDS.
Nasayran nga ang Department of Health (DOH) misugyot na kaniadto sa siyudad nga ibutang ang AIDS monument diha sa Fuente Osmeña o kaha sa North ug South Reclamation area apan wala gihapon natigayon. - Elly Bolonos (BANAT NEWS)