Milugos sa dalagita gikasohan na

CEBU, Philippines - Pormal nang gipasakaan og kasong pagpanglugos ug attempted murder ang tulo ka mga lalaki nga milugos sa usa ka 16 anyos nga dalagita ug midunggab pa sa kaubang lalake niini human motambong og disco didto sa lungsod sa Balamban, Sugbu, niadtong miaging adlaw.

Ang nag-atubang sa maong kaso mao sila si Crisanto Labura, 22 , Eulogio Ababon, 37, ug Lino Bacus, hingkod , nga pulos taga barangay Gaas, lungsod sa Balamban.Ang biktima miasoy sa iyang apidabit nga niadtong Domingo pasado alas 2:00 sa kaadlawon, kauban niya ang iyang higala nga si Jerson Alferez, 24, gikan sa disco sa usa ka sitio sa barangay Gaas.

Apan sa diha na sila sa dalan paingon sa ilang balay, giatangan sila sa tulo ka mga suspek nga sila si Labura, Ababon ug Bacus.

Unang girumbo sa mga suspetsado si Alferez ug gitabangan og dunggab sa makadaghang mga higayon.Dihang nahagba na sa yuta si Alferez, gitabangan dayon nila og lugos ang dalagita ug pagkahuman, nanibat dayon.

Si Alferez gihatod dayon sa hospital samtang ang dalagitang gilugos miadto sa kapolisan ug gisumbong ang maong hitabo.

Milihok dihadiha ang kapolisan sa lungsod sa Balamban, hinungdan nga nasikop dayon si Ababon, nianang Domingo ug sa pagka-Lunes nasikop usab sila si Labura ug si Bacus.

Ang maong kaso anaa sa buhatan ni Cebu Provincial Prosecutor Jane Petralba. Si Alferez anaa pa karon sa talandugong kahimtang sulod sa usa ka hospital dinhi sa siyudad sa Sugbu. – BANAT NEWS