Mitulis sa Fooda ikiha na

CEBU, Philippines - Ipasaka na ugma, Biyernes sa kapolisan sa dakbayan sa Sugbu ang kasong pagpanulis batok sa mga mitulis sa Fooda Savers Mart niadtong miaging semana diin mikabat sa P100 mil ang kantidad sa mga sinseyo nga nasakiyo sa maong mga tulisan.

Kini gibutyag ni Sr. Supt. Patrocinio Comendador, hepe sa kapolisan sa dakbayan sa Sugbu atol sa usa ka press conference sa iyang buhatan kagahapon.

Giklaro ni Comendador nga may affidavit na silang gikuptan karon gikan sa usa ka security guard kinsa positibong miila sa mga tulisan.

Bisan wala niya ibutyag ang ngalan, apan ang maong security guard mitataw nga nailhan niya ang tulisan nga nagpakaaron-ingnong polis dihang gidis-armahan siya niini.

Nasayran nga ang tulo sa walo ka mga tulisan , nagsul-ob og uniporme nga pang athletic sa PNP ug nagdalag tag-as nga armas dihang nagpakaaron -ingnong nag-inspeksyon sa indiscriminate firing diha sa Food Savers Mart.

Nakurat nalang ang mga security guard sa maong tindahan dihang kalit lamang silang gipang-dis-armahan uban sa pagdeklarar nga tulis. – BANAT NEWS