Operators misempatiya sa mga drayber

CEBU, Philippines - Operators sa pampublikong sakyanan misempatiya sa mga drayber kabahin sa gihulagway nilang bug-at kaayong multa sa matag kalapasan sa balaod sa trapiko ug mibahad nga modangop sa korte kung gikinahanglan.

Si Benjamin Ryan Go, vice chairman ug general manager sa Cebu Integrated Transport Services Cooperative (CITRASCO) sa pakighinabi sa Banat News nagkanayon nga nanghinaot silang paminawon ang petisyong ilang nasang-at ngadto sa Land Transportation Office (LTO).

Gawas sa Citrasco dinhi duna say susamang mga petisyong gisang-at ang ubang kahugpungan sa mga drivers.

Si Yu miingon nga kun mapakyas ang ilang tinguha sa petisyon modangop na sila niini ngadto sa korte aron kwestyunon ang legalidad niini.

“Among ipasusi sa korte ang legality sa kamandoan sa Department of Transportation and Communication (DOTC). Asa man ang angay tahuron ang traffic code ba nga gipanday sa kongreso o ang department order ba nga giluwatan lang sa departamento sa DOTC?” sumala pang Yu.

Nasayran nga ang bag-ong multahan sa traffic violation nga wala gikahimuot sa mga drayber mao ang no stopping nga may multang P6 mil, driving without license gikan sa P750 ngadto na sa P1,750; tampered licensed plate gikan sa P375 ngadto na sa P2 mil; straying outside from authorized line P6 mil sa una palang offense; disregarding traffic signs gikan P250 ngadto na sa P1,250 ug failure to switch-on the right signal P6 mil.

Si Yu nagkanayon nga ilang pakigkitaan si LTFRB-7 director Romulo Bernardez aron mapasabot sa habig sa mga driver nga misalmot sa kinalit nga transport strike niadtong Lunes.

Hinuon matud pang Yu ang mga sakop sa Citrasco wala moapil sa maong strike apan miangkong duna gyud hinuoy mga drayber nga ilang miyembrong miapil sa kalihukan.

Sa nasayran nga gibanabanang 80 porsiyento nga napiang ang biyahe sa mga sakyanan tungod sa kalit kaayong pag-welga sa mga drayber niadtong Lunes.

Hinungdan nga nagtinguha ang dakbayan sa Sugbu sa pagpakanselar sa mga prangkisa niadtong mga sakyanang misalmot sa maong strike.