Gipusil sa nagmaskara patay

CEBU, Philippines - Patay ang usa ka trabahante sa usa ka establisamento sa sitio Riverside sa barangay Canduman, dakbayan sa Mandaue dihang kalit gipusil sa nagmaskarang duha ka lalaking nagsakay og motorsiklo alas 6:30 ang takna sa buntag kagahapon.

Ang namatay giila mao si Raul Alicaway, 39, lumad nga taga New Lipata, barangay Pusok, dakbayan sa Lapulapu ug nagtrabaho sa Producer Feeds sa maong dapit.

Si PO3 Tirso Plania, imbestigador sa Presinto 6 sa Canduman Police Station nga nahinabi sa Banat News miingon nga paingon sa trabahoan ang biktima kuyog sa laing upat ka mga trabahante sakay og sakyanan.

Apan paghidangat sa maong lugar, kalit mi-overtake ang usa ka motorsiklong may duha ka tawong nagsakay ug nagmaskara ug ang backrider mipusil sa biktima.

Matud pa ni PO3 Plania naigo ang biktima sa luyong bahin sa hawak ug wala makalapos ang bala.

Ang wala hiilhing mga tawo daling nakapabulhot og padagan sa motorsiklo palayo sa maong lugar.

Ang mga kaubang trabahante sa biktima mao nay midala kaniya ngadto sa Cortes General Hospital sa Ibabao, dakbayan sa Mandaue apan namatay kini alas 8:40 sa buntag sa maong adlaw.

Si PO3 Plania miingon nga nagpadayon pa ang ilang imbestigasyon alang sa pagsuta sa hinungdan sa maong pagpamusil ug pag-ila sa mga mamumuno sa biktima. - Romeo Limpangog (BANAT NEWS)